|
Du seisch mir ich seigi vill z'dick
myni Gsundheit seig in G'fahr
Schoggi seig im Fall de falsch Kick
Schluss mit Wurscht und mit Tartar
Nur na Wasser anschtatt Wy
kein Schwarztee us em Samovar
Mit Kafi-Fertig seig's verby
kein Schlummertrunk meh a de Bar
Ja Du chasch mir vill verzelle
bi doch wohl keis Dromedar
Suuf Wasser wie es Reservoir
Wer nöd gnüüsst, wird ungnüüssbar!
Seisch mir, ich müesi e chly
brämse
verzichte uf min Jaguar
So gnüegsam wie e Gämse
mit Velo, schtatt mit Autocar
Schluss mit TV, mit Konsum
furt mit mim ganze Inventar
Verzichte uf mis Eigetum
verzichte uf es Honorar
|
Jä Du chasch mir vill verzelle
lueg Di aa, Du Missionar
Es bruucht ja wohl kein Kommentar:
Wer nöd gnüüsst, wird ungnüüssbar!
Jetzt seisch na, ich söll's verchlämme
söll i mich gah, vor em Altar
Mich wäge myne Tryb go schäme
und läbe wie de Balthasar
Oh, wer bisch Du, wo mir Befehl git
Anton: jetzt wirsch unhaltbar
Hör doch uf, Du mit Dym Bull Shit
verzieh Dich ohni «au revoir»!
Hätt nöd vor Jahre scho de Mick gseit?
ime Song so wunderbar
«I can't get no satisfaction»
Wer nöd gnüüsst, wird ungnüüssbar!
|
